அமாவாசையன்று சந்திரன் எங்கே இருக்கிறது?

வானவியல் > சந்திரன்

ஜூலை, 2009

அமாவாசையன்று அதிகாலை கிழக்குத் திசையில் வழக்கம்போல் சூரிய உதயத்தைக் காணலாம். அமாவாசையன்று கிழக்குத் திசையில் சூரியன் மட்டுமன்றி சூரியனுடன் சேர்ந்து சந்திரனும் உதிக்கிறது. மாலையில் சூரியனுடன் சேர்ந்து அஸ்தமனமாகி விடுகிறது.

அமாவாசையன்று சூரியனுடன் சேர்ந்து உதிக்கும் சந்திரன்

ஆனால் சூரியனின் பிரகாசம் காரணமாக சூரியனுடன் சேர்ந்து உதிக்கிற சந்திரனை நம்மால் காணமுடியவில்லை. உங்கள் கண்களுக்கு அபூர்வ சக்தி இருந்து ஒரு வேளை சந்திரன் - சூரியனின் அருகே - தெரிந்தாலும் அது ஒளியற்றதாக அருவம் போல மங்கலாகத்தான் தெரியும்.
உதாரணமாக மே 31, 2003 அமாவாசை. அன்று சூரிய உதய நேரம் காலை 5-41. சந்திரனின் உதய நேரம் காலை 5-36.
அமாவாசை கழிந்த மறுநாள் சந்திரன் சற்று தாமதமாக உதிக்கும். அதற்கு மறுநாள் மேலும் தாமதமாக உதிக்கும். இப்படியே சென்று 14 நாட்களுக்குப் பிறகு சந்திரன், சூரியன் உதித்து சுமார் 12 மணி நேரம் கழித்து - அதாவது மாலையில், கிழக்குத் திசையில் - உதிக்கும். அப்போது அது முழு நிலவாகத் தெரியும் (பெளர்ணமி).